Warga Santun

Warga kilangan Santun

ampura titiang mangigum
ngaduang pongah idepe
dening pangkah milu ngapus
niru sang putusing kawi
angkuh mapi idep ririh
dewek tambet tan karasa
milu ngawe kidung
tong masa lek gigis

ajume milu manutug
bawur basa basitane
critane tan manut unduk
pasang kruna arep wuri
mogi sira sang wus wagmi
ledang asung ngampurayang
tambet manah punggung
titiang sang manganggit

kawit critane rumuhun
wong sudra nista rupane
janma tambet lintang dusun
I Warga pranama yukti
dening sukane mangipi
ngulati janma kanyaka
alep sada ayu
pinda kadi sari

tong masa deweke punggung
ngantosang ulung bulane
lemah peteng kajum ajum
disubane tong katampi
sakit tur kaliwat sedih
bilang wai mapangenan
gimih inguh kayun
ngame ame mati

suba waneh jani bendu
suwud ngetel yeh matane
prajani ngadebras bangun
ngumbar munyi pati krimik
ngubat abit reged ati
sapihang tong ngelah rasa
depang kutang sampun
aden tanpa rasmi

suba engsap teken santun
buka masutsut idepe
tan malih gingang ring kayun
tani rungu janma estri
ngaden tong nawang karasmin
timbang sahi kasengsaran
ngulati kalangun
kangguang ban magending

keto critane kawuwus
tunjunge ilang sarine
metu warga tanpa santun
buka truna tanpa rasmi
puput titiang kadi mangkin
beloge anggon bebanggan
sinah sampun pacul
wong dusun ko yukti

2016, wangdusun

Sinom Sindir

ada kone crita anyar
jadmane kaucap ririh
ideh ideh ya manyatwa
asing tuturang kapingit
anake liu mirengin
belog tusing nawang unduk
ulah ngugu ne sing tawang
kena daya lintang silib
kone tutur
uli pawisik batara

sing taen nyuluhin awak
mameka di banyun warih
ningal isine ditengah
apa saja apa tusing
idep puyung manah luang
masih ya kodag manutur
bibihe gimih manyatwa
kaden saja ne tepukin
pati sundul
ne tidong tidong satwayang

ortane kaliwat wayah
buka subatahe yukti
wayahan kabungut kocap
twara masa teken diri
kone ngidang nyolek langit
ngaku waged sastra putus
makejang aluh kaucap
nanging tuah pragat dimunyi
angkuh sumbung
inggih titiang ke punika

idekil mabet sadu
wang dusun jwa
15

Kidung Mledped

Kidung Mledped
Ginada Uwad-uwadan

Ada kakidungan anyar
Anyar den wau kagurit
Kagurit antuk i muda
Muda paksa mawuh dusun
Dusun tiwas lintang tuna
Tuna budi
Budi pakertine ceda

Ceda rupa ceda rasa
Rasa tan pantes mamanggih
Mamanggih gendinge kirang
Kirang basa malih bandung
Bandung swarane tur buyar
Buyar dang ding
Dang ding donge tani karwan

Karwan beloge bas ngodag
Ngodag manglintangin gumi
Gumi alite dadua
Dua dasa yusane kantun
Kantun wimuda ne nyurat
Nyurat gending
Gending mawuwuh carita

Carita janma dilemah
Lemah peteng ya mangeling
Ngelingin awaknya lekad
Lekad idup mondong tuyuh
Tuyuh ibannya magawa
Gawa sulit
Sulit mamanjakin layah

Layah bibih layah basang
Basang bengka liunan iri
Iri ati teken anak
Anak sugih brana liu
Liu ane bakat rambang
Rambang sahi
Sahi manyakitang awak

Awak beloge kaliwat
Liwat ajum buina celig
Celig mangareka daya
Daya silib buin uwug
Uwug manyama mabraya
Braya kanti
Kanti ilang twara tawang

Twara tawang beneh salah
Salah lampah dadi sakit
Sakit sakala niskala
Niskalane jani sungsung
Sungsung linggihang ko mara
Mara inget
Inget tekening batara

Ampura titiang wang dusun