Bali Sripit

Gurat gurit

Srarat sririt 
Jumprat jumprit
Keprat keprit

Duh, keneh inguh kuping sakit 
Awak uyang bibih ipit
Guat guit cara kucit 
Kema mai kedarat kedirit

Dini ditu kerapat keripit Kene keto ngae cupit 

Gede cenik saling apit

Saling gebug saling sigit

Ne duuran kejengat kejengit

Ne betenan sedih lilit

Sayan menek sayan kebit

Sayan tuun sayan singit

Menek pipis ngaba sepit

Ada galah laut nguntit

Belig licit cara julit

Aluh makelid nyambil ngejengit

Suud bares dadi demit

Braya kanti saling sigit

Panak somah pada sengit

Saling bisbis saling sitsit

Sing dinatah sing dibukit

Suba gundil tusing mekulit

Tusing mayuga boya melampit

Kayu mentik suba mesebit

Gumi linggah dadi cupit

Sing nu carik sing ada gitgit

Onya telah dadi rerakit

Tanah beton dadi kulit

Tata tentrem dadi rusit

Seger oger dadi mayit

Sepanan tegteg enggalan nyumprit

Mih , tusing kuat nyalanin sakit

Tusing karoan encen ne pingit

Tusing karoan jemet lengit

Tusing karoan agung alit

Baline Spirit dadi Sripit

wangdusun

Sinom Rereg Gumi

Aduh opek manah nira

Ngiwasin gumine jani

Awake pindayang mica

Padidi ilang nyatuwin

Ne makada buka jani

Inguh uyang ati ibuk

Nyalengsong sampun dapetang

Gumine saja ngebusin

Solah laku

Suba naya nura cara

Prakangge tempek tempekan

Tan wenten katurut malih

Sampun masaing saingan

Mahujungan bilang wai

Papatihe ndriya iri

Jaksa rusit kapitumbuk

Sami mangubungin dusta

Maling akweh ngisi gumi

Bilang sunut

Liyu kriya rarancangan

Manahe sisu ngatonang

Mirah tong kena ingetin

Apan mutene muruban

Mas tature suba jerih

Bahanya i lancung sari

Slakane twarada laku

Apan suba aduk timah

Puput dadi karok sami

Bilih campur

Sadya nguwugang nagara

Jero kutha suba rusak

Tani karwan iwang yukti

Cen ya gugu cen ne kutang

Jalmane pada ngadanin

Sampun awor jadma bali

Mamunyi cara malayu

Angde tityang pipis cipak

Dibeten tanahe nengsil

Sinah sampun

Pragat manguncrukang awak

Yening  nira manuutang

Sinah baya mangemasin

Doning masa twara bisa

Awake bas conol yukti

Tansah pacang ngawe kingking

Brayane sami nyalisut

Sabran dina wantah ngoncang

Jati mangebusin ati

Yen ya purug

Masih payu mangguh lara

Ampurayang kula nyurat

Gendinge twara mabudi

Masih satwanya bawakan

Basanya masawang pedih

Doning wantah isin ati

Manahe kadungan ibuk

Brangtine mangodag odag

Mangatonang gumi jani

Meh ya uwug

Ne ke kocap kala yuga

Wangdusun211116

Sinom Suluh Awak

Gati-gati awak tuna
Lacure buin tiwasin
I jong ya ilang katir nya
Kenkenang ningkadin pasih
Kudiang ban idewek jani
Lemahe tuara katepuk
Petenge ilang sunaran
Guna awak tanpa aji
Sinah tuhu
Bayane tuara kelidan

Suba tawang awak lara
Semune patut kedasin
Melahang ningkahang awak
Dabdabang munyine becik
Guna sastra sadhu budi
Tekek di ati kategul
Guna dusune resepang
Tingkahang sewai wai
Buin patut
Imbuhin guna ri awak

Suba jani matingkidan
Lacure suba mimpasin
Ngenah galange apadang
Tindakan batise gingsir
Melah melahang ningkahin
Pang da kanti salah gugu
Dharmane patut tiwakang
Salahe patut iwasin
Ento tuhu
Jalanang kayang kawekas


( Wang dusun ‘14)