Kidung Mledped

Kidung Mledped
Ginada Uwad-uwadan

Ada kakidungan anyar
Anyar den wau kagurit
Kagurit antuk i muda
Muda paksa mawuh dusun
Dusun tiwas lintang tuna
Tuna budi
Budi pakertine ceda

Ceda rupa ceda rasa
Rasa tan pantes mamanggih
Mamanggih gendinge kirang
Kirang basa malih bandung
Bandung swarane tur buyar
Buyar dang ding
Dang ding donge tani karwan

Karwan beloge bas ngodag
Ngodag manglintangin gumi
Gumi alite dadua
Dua dasa yusane kantun
Kantun wimuda ne nyurat
Nyurat gending
Gending mawuwuh carita

Carita janma dilemah
Lemah peteng ya mangeling
Ngelingin awaknya lekad
Lekad idup mondong tuyuh
Tuyuh ibannya magawa
Gawa sulit
Sulit mamanjakin layah

Layah bibih layah basang
Basang bengka liunan iri
Iri ati teken anak
Anak sugih brana liu
Liu ane bakat rambang
Rambang sahi
Sahi manyakitang awak

Awak beloge kaliwat
Liwat ajum buina celig
Celig mangareka daya
Daya silib buin uwug
Uwug manyama mabraya
Braya kanti
Kanti ilang twara tawang

Twara tawang beneh salah
Salah lampah dadi sakit
Sakit sakala niskala
Niskalane jani sungsung
Sungsung linggihang ko mara
Mara inget
Inget tekening batara

Ampura titiang wang dusun

Gita Sancaya

Gita Sancaya
Tembang Ngured

Ada kidung rikala mangungsi wukir
Duk amurang lampah
Manungkulang sungsut ati
Miijil tembang saking manah

Daging kidung meh crita di gumi
Katuturan reko
Imanusa nyalanin uripne
Satingkahnya salampahing budi
Kalaning mamunyi
Tuture maganti ganti

Tuara resep tutur tuhu
Sok mangajar mapi mapi
Manguronin anak lian
Twara inget iban miskin
Tuna sastra tuna widya
Tuara tepuk gina damping

Mangumbar mangambyar ujar
Mananjayang bibih paling
Kema mai ngadep satwa
Katungkul idepe bingung
Nyen sih suka madingehang
Gudug bintit
Pulang paling maruncungan

Tonden suwud
Amunto mangadol tutur
Masih ya mamada
Mangulurin daya singkil
Mabet sadu
Mangangkurang munyi tawah

Keto gawennya salemah
Bilang wai glindang glindeng ngadep munyi
Len bin ungguhang ring buku
Ne acakep dadi dwa
Ne dwang cakep bisa dadi satus buku
Asing kodag manyatwayang
Uli smara kayang mati

Sakatah tingkahing urip
Suba mati malih lekad
Ada masih buin reko
Manuturang laku lampah
Mangalihin kadyatmika
Makebur tuture nambung
Sinome mapi manawang

Ngaku tatas madan sunya
Ane puyung ane misi
Suba lapah ngrangsuk sastra
Saraja busana sidhi
Isin puyung tutur jati
Suba ya tekek kategul
Telah kalis ban mangupak
Sakatahing sastra aji
Ngaku weruh
Masuci madurmanggala

Yen pinehang buka anak liwat edan
Bibihe liwat lamis
Uyang pati cabcab
Bingah binguh santulan
Lali teken awak diri
Lakune singsal
Nyelsel manandang tangis

Sapunika solah jadma paling
Ya malaku laku tani karwan
Bas kategehan tuture
Tingkahe demen ajum
Mangulurin dayane celig
Ulap ken arta brana
Iju ngadep tutur
Mamiratin pipis anak
Tong bisa menggat ruh awake padidi
Mapi nambanin anak

Kaden saja sakti nanging twah puyung
Sangkan eda ulah mapi
Paling melah ngardi hayu
Suka duka lara pati
Twah mawit lekad ri panon

Puput sampun tembange kaigum
De wang dusun praya
Duk iseng mangunsi wukir
Ngumambang mijil ring kahyun
Maganti ganti kakidunge
Reng ginada mincang mincung
Ngamungkur ngamelad semara
Sinome kadi mas kembang
Sakalangon durmitane nandang manis
Ngangobin sang ningal
Ngawe minggat ruhing ati
Mamangguh kang sukadriya

Ampura wantah babelogan i wong dusun
2016

Ahhh

Ahhh

mumpung ade galah
jalan alih ne melah
kutang ane salah
pang sing tulah
nyanan telah
ane jumah
benyah

ngalih melah
pang bani ngalah
pang nyak kadi gedah
apanga twara kanti belah

yen gedahsuba belah
makejangne benyah
tusing nu bungah
pianak somah
kadi punyah
pada osah
ngahngah

Sumardika, 2014